![](https://static.wixstatic.com/media/11062b_9f421918574743b48202cb0dacbd77d4f000.jpg/v1/fill/w_1920,h_1080,al_c,q_90,enc_auto/11062b_9f421918574743b48202cb0dacbd77d4f000.jpg)
geschichte
Pra la senteda generela ai 21 de fauré dl 1942 iel nasciù l'idea de cumpré uni ann n'opra y de mëter pona so n museum dl artejanat. Per fé chësc fòvel unì numinà n cumité. Bele pra la mostra da d'instà dl 1942 iel unì cumprà trëi opres per l museum. Danz che l’idea dl museum fova tumeda tl’ega pervia dla segonda viera.
Davia che l cumisser Sanoner ti à lascià la sala dla mostres ala Wehrmacht ne n'à n pudù fé deguna mostra da d'instà ti ani 1944 y 1945.
Do la viera se à la situazion inò normalisà y bele d'autonn dl 1945 iel ruvà n valgun artisć nueves te cunsëi, danter lauter Viktor Moroder dl Tannenheim, Raimund Mureda, Milly Schmalzl y Rudolf Moroder de Rudolfine. L cunsëi fova a una de jì inant cun Motive religëusc, ma ne fajan nia do a d'autri stii da pludagiut y se ispiran plutosc a nosc tëmps. N purvova ora d'autri materiai, cossa che univa critheda dai scultëures.
Tl 1946 à n pudù scumencé cun l'atività dla lia. Te chël ann ova la lia 79 cumëmbri, danter lauter 12 ferlëigri y sies ëiles. L prutagonist d'atività tl tëmp riesc do la segonda viera mundiela fova Rudolf Moroder Rudolfine, Präsident der ntlëuta dla lia y dal '60 al '64 ambolt de Urtijëi. Per la mostra da d'instà dl 1946 fòvel unì metù a jì n cuncors de criples. Tla giuria fòvel Raimund Mureda, Ludwig Moroder, Albino Pitscheider, Luis Piazza und Alois Insam. Lie unì premià Finy Martiner, Frieda Prinoth, Ulrike Schmalzl y Milly Schmalzl. Tl protocol dla lia iel scrit che la lia à per l prim iede arjont si travert, che fova chël de se destanzië dal tradiziunel y dal stil nazarenn, jan a crì stredes nueves. Suzes à abù i reliefs, nia plu la criples ulache n pudova spusté i mandli. Sëuraprò fòvel na majera variazion de materiai che dant: lën, ghips, mauta, ceramica y sas. Ich artisć jëuni ne ulova nia fé do ai libri o ziplé prudoc turistics; ma i fova animei dala modernità .
Na mostra mpurtanta dl '46 fova nce l'espusizion de opres de Åšepl Moroder da Jumbierch, davia che l fova l aniverser di 100 ani do si nasciuda.
Tl ann 1947 fòvela pona tan inant che n à despartì l'ert dal artejanat. N chël ann iel stat doi mostres: chëla d'ert fova tla sënta dla lia, chëla de artejanat fova tla Scola Elementera. I criteres per pudëi fé pea pra la mostra d'ert fova bëndebò rigurëusc. La minonghes n con' dla mostra fova despartides: a vel' un ti desplajòvel che l manciova la pert tradiziunela.
La formes de esprescion nueves ne univa nia drë' ntendudes dala majera pert dla jënt, cis sce l corp uman univa prejentà te na maniera stiliseda. I prevesc judova pro a tizé su la cuestion. L scultëur jëunn Siegfried Moroder Rudolfine ova metù ora tla mostra n torso de n'ëila de mauta cueta (terracotta) de chël che l univa scialdi bruntal tl luech. Perchël dh l'oma dl scultëur unida tla mostra, se à metù l corpus delicti te si sportula da cumpré ite y s'l à tëut pea a cësa.
La doi mostres à fat unì su tan de descuscions y tenscions che l univa tenì su duta l'atività dla lia. Perchël à l cumisser Leo Prinoth nvià duc i artejans a na senteda, ulache l ie nce unì cunedì l program yl inuem nuef. Da ntlëuta inant ne n'ova la lia nia plu inuem „Ausstellungsverein für Kunst- und Kunstgewerbe“ ma „Kreis der Kunstschaffenden“. Da moinlà dassova chësta lia mé plu mëter ora opres che rujenova la rujeneda de si tëmp. Copies y imitazions de stii ne fova nia plu lascedes pro. Na giuria dassova asseguré che i „acte“ sibe fac cun finalità artista y nia sensuela. Chisc pruvedimënc dassova purté pro che i artisć ciafieie inò y che l unissa miurà l inuem de Gherdëina. La lia univa mpo meneda inant dal medemo cunsëi cun a cë Rudolf Moroder Rudolfine.